محمد بن جمال: طيب بس خلينا متفقين ان الوضع الاقتصادي للبلد والاجتماعي والوضع المعيشي، مش مستحمل الاسماء الجديده اللي بدأت تتوغل في مجتمعنا. يعني زمان كانت الأسماء عادية جدا … كانت محمد واحمد … ومصطفى وعبد الله وعبدالرحمن وسيد و زكريا … لا زكريا مكنش منتشر ..بس برده يعني مألوف. بدأت تدخل حاجات جديده زي تامر .. وباسل ..وجاسر .. وقولنا ماشي عادي اسامي جلها شجاعه واقدام … ماعدا تامر يعني.
اسامي البنات كانت داليا وعزه ونوره وسلمى وساره وشيماء وسوسن … هو سوسن برده مكنش متداول بس قشطه كان موجود، مديحة برده كان موجود ومن حلاوته اتعمله قصه.
لكن ايه بقى موضوع الاسامي اللي طالعين فيها اليومين دول ..والمشكلة مش في كده ..لا ده كل اسم بينزل معاه معناه.
تسأل البنت من دول اسمك ايه ؟! تقولك … اسمي اشكينولا … وده معناه ايه يا حبيبتي ؟! ده شكله منتج من منتجات سينا كولا مش كده؟. تقولك لا طبعا ..ده معناه الذهب السائل على حبيبات الفضه المطعمة بالألماس … ولو مش مصدق ابقى روح هات حته دهب سأل علي فضه وألماس واسألها اسمك أيه.
تسأل التانيه وانتي يا حبيبتي اسمك ايه ؟ تقولك اسمي «لودينه « …فأنت بكل تلقائيه تقلها قصدك رودينه بس انتي لدغه في الراء مش كده ؟! تقولك لا «لدينه» …يعني لدغة العقرب الصائم في الصحراء لأنثى الماعز. اللي هو اي كلام المهم يبقى ليه معنى … طب وسموكي كده ليه يا حبيبتي ؟! تقولك عشان فيه قوة وشراسة مع الاعداء وعطف وحنان مع الاحباء.
تسأل بقى التالته وانتي يا عسل اسمك ايه ؟! تقولك اسمي « سالوبيتا « … تقولها ده مؤنث …سالوبيت اللي بيتلبس مش كده ؟! هتقولك لا ده معناه … رائحه المسك الممزوج بالذهب كان بيحطه الفرس تحت باطهم في الحرب عشان مايعرقوش وتبقى ريحتهم وحشة.
تسأل الرابعه وانتي اسمك أيه يا سكر ؟! تقولك اسمي «شابيناز»، وده معناه أيه يا حبيبتي ؟! … ده اسم جديد معناه الصدف المدفون بجوار الكعبه في الجاهليه … تقولها وأيه اللي هيجيب الصدف جنب الكعبه ؟! …تقولك قريش وهما راجعين من المصيف كان بيبقى شابك في جلاليبهم ..انت عارف مكنش فيه مايوهات زمان وكانوا بينزلوا البحر بالجلبيه «بلطيم استايل وكيدزا « ..المهم معناه الندره في الاشياء.
وتستمر الاسماء الغريبه ومعانيها الاغرب وهكذا …. بس انا فعلا معنديش مانع تسموا الأسامي اللي انتوا عاوزينها بس راعوا ان الدنيا بقت صعبه فمتصعبوهاش علينا اكتر بأسمائكم دي … واختاروا أسماء سهله عشان ريقنا بينشف … وكمان كام سنه اثيوبيا هتقطع عنا الميه … ومش هنعرف ننطق اسمائكم .
#اسمك_ايه_يا_حبيبتي؟! #سيلين #سيلين_ولا_واحد_وعسلين هاهاهاها
مدون مصري
